# Nuskha-e-Hamidia (نسخۂ حمیدیہ) — Appendix II: a selection from the Hamidia manuscript

Mirza Asadullah Khan Ghalib · Urdu · 4 poems · 25 couplets

Source: https://ahleqalam.tech/library/ghalib/nuskha-e-hamidia (Ahl-e-Qalam library). Text from the Kulliyat-e-Ghalib web book, compiled by Juwairiya Masood from Nuskha-e-Urduweb and collated with the Arshi, Hamidia, Mehr and Raza editions; released into the public domain (CC0) at github.com/saadatm/ghalib. Each couplet has its own page; cite that URL.

## غزلیات — Ghazals

### دعویٰٔ عشقِ بتاں سے بہ گلستاں گل و صبح

https://ahleqalam.tech/library/ghalib/nuskha-e-hamidia/ghazals/01

[1](https://ahleqalam.tech/library/ghalib/nuskha-e-hamidia/ghazals/01/1)

دعویٰٔ عشقِ بتاں سے بہ گلستاں گل و صبح  
ہیں رقیبانہ بہم دست و گریباں گل و صبح  

[2](https://ahleqalam.tech/library/ghalib/nuskha-e-hamidia/ghazals/01/2)

ساقِ گل رنگ سے اور آئینۂ زانو سے  
جامہ زیبوں کے سدا ہیں تہِ داماں گل و صبح  

[3](https://ahleqalam.tech/library/ghalib/nuskha-e-hamidia/ghazals/01/3)

وصل آئینۂ رخاں ہم نفسِ یک دیگر  
ہیں دعا ہائے سحر گاہ سے خواہاں گل و صبح  

[4](https://ahleqalam.tech/library/ghalib/nuskha-e-hamidia/ghazals/01/4)

آئینہ خانہ ہے صحنِ چمنستاں تجھ سے  
بس کہ ہیں بے خود و وارفتہ و حیران گل و صبح  

Editors' notes:

تجھ سے: یہاں متن میں "تجھ سے" کو کاٹ کر موٹے قلم سے شکستہ خط میں "یکسر" تحریر کیا ہے۔ (حاشیہ از پروفیسر حمید احمد خان، مرتبِ نسخۂ حمیدیہ) — جویریہ مسعود  

[5](https://ahleqalam.tech/library/ghalib/nuskha-e-hamidia/ghazals/01/5)

زندگانی نہیں بیش از نفسِ چند اسدؔ  
غفلت آرامیٔ یاراں پہ ہیں خنداں گل و صبح  

### صاف ہے از بس کہ عکسِ گل سے گل زار چمن

https://ahleqalam.tech/library/ghalib/nuskha-e-hamidia/ghazals/02

[1](https://ahleqalam.tech/library/ghalib/nuskha-e-hamidia/ghazals/02/1)

صاف ہے از بس کہ عکسِ گل سے گل زار چمن  
جانشینِ جوہرِ آئینہ ہے خارِ چمن  

[2](https://ahleqalam.tech/library/ghalib/nuskha-e-hamidia/ghazals/02/2)

ہے نزاکت بس کہ فصلِ گل میں معمارِ چمن  
قالبِ گل میں ڈھلی ہے خشتِ دیوارِ چمن  

[3](https://ahleqalam.tech/library/ghalib/nuskha-e-hamidia/ghazals/02/3)

برشگالِ گریۂ عشاق دیکھا چاہیے  
کھل گئی مانندِ گل سو جا سے دیوارِ چمن  

Editors' notes:

شعر: یہ شعر مرتب کے بقول قلمی مخطوطے کے متن کے بجائے حاشیے پر موٹے قلم سے شکستہ خط میں درج ہے۔ — جویریہ مسعود  

[4](https://ahleqalam.tech/library/ghalib/nuskha-e-hamidia/ghazals/02/4)

تیری آرائش کا استقبال کرتی ہے بہار  
جوہرِ آئینہ ہے یاں نقشِ احضارِ چمن  

[5](https://ahleqalam.tech/library/ghalib/nuskha-e-hamidia/ghazals/02/5)

بس کہ پائی یار کی رنگیں ادائی سے شکست  
ہے کلاہِ نازِ گل بر طاقِ دیوارِ چمن  

[6](https://ahleqalam.tech/library/ghalib/nuskha-e-hamidia/ghazals/02/6)

الفتِ گل سے غلط ہے دعویٰٔ وارستگی  
سرو ہے باوصفِ آزادی گرفتارِ چمن  

[7](https://ahleqalam.tech/library/ghalib/nuskha-e-hamidia/ghazals/02/7)

وقت ہے گر بلبلِ مسکیں زلیخائی کرے  
یوسفِ گل جلوہ فرما ہے بہ بازارِ چمن  

[8](https://ahleqalam.tech/library/ghalib/nuskha-e-hamidia/ghazals/02/8)

وحشت افزا گریہ ہا موقوفِ فصل گل اسدؔ  
چشمِ دریا ریز ہے میزابِ سرکارِ چمن  

### ہم زباں آیا نظر فکرِ سخن میں تو مجھے

https://ahleqalam.tech/library/ghalib/nuskha-e-hamidia/ghazals/03

[1](https://ahleqalam.tech/library/ghalib/nuskha-e-hamidia/ghazals/03/1)

ہم زباں آیا نظر فکرِ سخن میں تو مجھے  
مردمک ہے طوطیٔ آئینۂ زانو مجھے  

[2](https://ahleqalam.tech/library/ghalib/nuskha-e-hamidia/ghazals/03/2)

یادِ مژگاں بہ نشتر زارِ صحرائے خیال  
چاہیے بہرِ تپش یک دست صد پہلو مجھے  

[3](https://ahleqalam.tech/library/ghalib/nuskha-e-hamidia/ghazals/03/3)

خاکِ فرصت برسرِ ذاقِ فنا اے انتظار  
ہے غبارِ شیشۂ ساعت رمِ آہو مجھے  

[4](https://ahleqalam.tech/library/ghalib/nuskha-e-hamidia/ghazals/03/4)

اضطرابِ عمر بے مطلب نہیں آخر کہ ہے  
جستجوئے فرصتِ ربطِ سرِ زانو مجھے  

[5](https://ahleqalam.tech/library/ghalib/nuskha-e-hamidia/ghazals/03/5)

چاہیے درمانِ ریشِ دل بھی تیغِ یار سے  
مرہمِ زنگار ہے وہ وسمۂ ابرو مجھے  

[6](https://ahleqalam.tech/library/ghalib/nuskha-e-hamidia/ghazals/03/6)

کثرتِ جور و ستم سے ہو گیا ہوں بے دماغ  
خوبرویوں نے بنایا ہے اسدؔ بد خو مجھے  

Editors' notes:

ہے اسد: اس مصرع میں "ہے اسدؔ" کے لفظ کو کاٹ کر "غالبؔ" لکھا گیا ہے۔ — حمید احمد خان  

### نیم رنگی جلوہ ہے بزمِ تجلی رازِ دوست

https://ahleqalam.tech/library/ghalib/nuskha-e-hamidia/ghazals/04

[1](https://ahleqalam.tech/library/ghalib/nuskha-e-hamidia/ghazals/04/1)

نیم رنگی جلوہ ہے بزمِ تجلی رازِ دوست  
دودِ شمع کشتہ تھا شاید خطِ رخسارِ دوست  

[2](https://ahleqalam.tech/library/ghalib/nuskha-e-hamidia/ghazals/04/2)

چشم بندِ خلق جز تمثال خود بینی نہیں  
آئینہ ہے قالبِ خشتِ در و دیوارِ دوست  

[3](https://ahleqalam.tech/library/ghalib/nuskha-e-hamidia/ghazals/04/3)

برق خرمن زارِ گوہر ہے نگاہِ تیز یاں  
اشک ہو جاتے ہیں خشک از گرمیٔ رفتارِ دوست  

[4](https://ahleqalam.tech/library/ghalib/nuskha-e-hamidia/ghazals/04/4)

ہے سوا نیزے پہ اس کے قامتِ نوخیز سے  
آفتابِ روزِ محشر ہے گلِ دستارِ دوست  

[5](https://ahleqalam.tech/library/ghalib/nuskha-e-hamidia/ghazals/04/5)

اے عدوئے مصلحت چندے بہ ضبط افسردہ رہ  
کردنی ہے جمع تابِ شوخیٔ دیدارِ دوست  

[6](https://ahleqalam.tech/library/ghalib/nuskha-e-hamidia/ghazals/04/6)

لغزشِ مستانہ و جوشِ تماشا ہے اسدؔ  
آتشِ مے سے بہارِ گرمیٔ بازارِ دوست