رنج کی جب گفتگو ہونے لگی

رنج کی جب گفتگو ہونے لگیآپ سے تم تم سے تو ہونے لگی

چاہیئے پیغام بر دونوں طرفلطف کیا جب دوبدو ہونے لگی

میری رسوائی کی نوبت آ گئیان کی شہرت کو بہ کو ہونے لگی

ہے تری تصویر کتنی بے حجابہر کسی کے رو بہ رو ہونے لگی

غیر کے ہوتے بھلا اے شام وصلکیوں ہمارے رو بہ رو ہونے لگی

ناامیدی بڑھ گئی ہے اس قدرآرزو کی آرزو ہونے لگی

اب کے مل کر دیکھیے کیا رنگ ہوپھر ہماری جستجو ہونے لگی

داغؔ اترائے ہوئے پھرتے ہیں آجشاید ان کی آبرو ہونے لگی