جنوں رسوائیٔ وارستگی؟ زنجیر بہتر ہے

جنوں رسوائیٔ وارستگی؟ زنجیر بہتر ہےبہ قدرِ مصلحت دل بستگی، تدبیر بہتر ہے

خوشا خود بینی و تدبیر و غفلت نقد اندیشہبہ دینِ عجز اگر بدنامیٔ تقدیر بہتر ہے

کمالِ حسن اگر موقوفِ اندازِ تغافل ہوتکلف بر طرف، تجھ سے تری تصویر بہتر ہے

دلِ آگاہ تسکیں خیزِ بے دردی نہ ہو یا رب!نفس آئینہ دارِ آہِ بے تاثیر بہتر ہے

خدایا، چشم تا دل درد ہے، افسونِ آگاہی!نگہ، حیرت سوادِ خوابِ بے تعبیر بہتر ہے

درونِ جوہرِ آئینہ، جوں برگِ حنا، خوں ہےبتاں، نقشِ خود آرائی، حیا تحریر بہتر ہے

تمنا ہے، اسدؔ! قتلِ رقیب اور شکر کا سجدہدعائے دل بہ محرابِ خمِ شمشیر بہتر ہے