کہوں جو حال تو کہتے ہو "مدعا کہیے"

کہوں جو حال تو کہتے ہو "مدعا کہیے"تمھیں کہو کہ جو تم یوں کہو تو کیا کہیے؟

نہ کہیو طعن سے پھر تم کہ "ہم ستم گر ہیں"مجھے تو خو ہے کہ جو کچھ کہو "بجا" کہیے

وہ نیشتر سہی پر دل میں جب اتر جاوےنگاہِ ناز کو پھر کیوں نہ آشنا کہیے

نہیں ذریعۂ راحت جراحتِ پیکاںوہ زخمِ تیغ ہے جس کو کہ دل کُشا کہیے

جو مدعی بنے اس کے نہ مدعی بنیےجو نا سزا کہے اس کو نہ نا سزا کہیے

کہیں حقیقتِ جانکاہیٔ مرض لکھیےکہیں مصیبتِ ناسازیٔ دوا کہیے

کبھی شکایتِ رنجِ گراں نشیں کیجےکبھی حکایتِ صبرِ گریز پا کہیے

رہے نہ جان تو قاتل کو خوں بہا دیجےکٹے زبان تو خنجر کو مرحبا کہیے

نہیں نگار کو الفت، نہ ہو، نگار تو ہے!روانیٔ روش و مستیٔ ادا کہیے

نہیں بہار کو فرصت، نہ ہو بہار تو ہے!طرواتِ چمن و خوبیٔ ہوا کہیے

سفینہ جب کہ کنارے پہ آ لگا غالبؔخدا سے کیا ستم و جورِ ناخدا کہیے